1:1 | Deri-pada itu ktua k-pada Gayus yang kkaseh itu, yang sahya pun kaseh dalam kbtulan. |
1:2 | Hei kkaseh, sahya minta do'a spaya dalam sgala perkara angkau boleh beruntong, dan boleh bersehat, sama sperti jiwa angkau ada beruntong. |
1:3 | Kerna sahya sudah banyak suka-hati bila ada bbrapa sudara datang bersaksi deri-hal angkau punya kbtulan, sperti angkau ada berjalan dalam kbtulan. |
1:4 | Sahya t'ada satu ksuka'an yang lbeh bsar deri-pada ini, ia'itu yang sahya dngar deri-hal anak-anak sahya berjalan dalam kbtulan. |
1:5 | Hei kkaseh, angkau ada buat pkerja'an yang stiawan, apa-apa yang angkau buat k-pada sudara-sudara kita, mski-pun dia-orang bukan angkau punya knalan; |
1:6 | dia-orang sudah bersaksi dpan eklisia deri-hal angkau punya kaseh: dan baik juga angkau punya perbuatan kalau angkau hantarkan dia-orang sperti yang padan dngan Allah: |
1:7 | kerna deri sbab Nama itu dia-orang sudah kluar, dngan t'ada trima apa-apa deri-pada orang bangsa-asing. |
1:8 | Sbab itu kita patut sambot orang-orang yang bgini, spaya kita pula boleh dapat bhagian dalam kerja-nya kerna kbtulan itu. |
1:9 | Sahya sudah tulis k-pada eklisia sdikit perkara: ttapi Diotrifis pula, yang suka jadi kpala antara dia-orang smoa, t'ada sambot sama kita. |
1:10 | Sbab itu, kalau sahya datang, sahya nanti ingat pkerja'an-nya yang dia buat itu, ia'itu yang dia maki kita dngan perkata'an yang jahat: dan dia t'ada puas dngan ini, kerna bukan saja dia sndiri t'ada sambot sudara-sudara itu, ttapi orang yang mau sambot pun dia tahankan pula, dan buangkan kluar eklisia. |
1:11 | Hei kkaseh, jangan-lah ikut jahat punya tuladan, ttapi yang baik punya. Orang yang buat baik, ia'itu deri-pada Allah: orang yang buat jahat, ia'itu blum tengok Allah. |
1:12 | Dimitrius itu ada dapat ksaksian deri-pada smoa orang, dan deri-pada kbtulan itu pun: dan kita ini pun bersaksi; dan angkau tahu juga kita punya ksaksian ada btul. |
1:13 | Sahya ada banyak perkara mau tulis k-pada angkau, ttapi sahya t'ada mau tulis k-pada kamu dngan tinta sama pen: |
1:14 | ttapi sahya harap ta'brapa lama lagi mau jumpa sama angkau, dan kita boleh chakap dngan s-muka. Sjahtra-lah k-pada angkau. Sohbat-sohbat di sini kasi tabek. Kasi-lah tabek sama sohbat-sohbat di sana dngan sbot nama masing-masing. |