1:1 | Deri-pada Paulus, rasul Isa Almaseh dngan kahandak Allah, sperti dia sudah janji hidop yang di dalam Isa Almaseh itu, |
1:2 | datang k-pada Timotius, anak sahya yang kkaseh; biar-lah datang k-pada angkau anugrah dan ksian dan sjahtra deri-pada Allah Bapa, dan deri-pada Tuhan kita Isa Almaseh. |
1:3 | K-pada Allah, yang k-pada-nya sahya buat smbahyang dngan angan-angan hati yang suchi, turut sperti smoa nenek-moyang sahya, sahya bri shukor yang sahya t'ada brenti ingat angkau dalam sahya punya do'a, |
1:4 | dan siang-malam rindu mau tengok angkau, sbab ingat angkau punya ayer-mata, spaya sahya punya ksuka'an jadi gnap; |
1:5 | dan sahya teringat pula itu iman yang t'ada pura-pura yang ada dalam angkau; iman yang mula-mula skali di dalam angkau punya ma Lois punya hati, dan dalam angkau punya mak Yuniki pun; dan sahya rasa ada dalam angkau pun. |
1:6 | Sbab itu sahya ingatkan angkau, baik angkau galakkan kurnia Allah yang ada dalam angkau oleh sahya punya tangan sudah di-taroh atas angkau. |
1:7 | Kerna bukan-nya roh ktakotan Allah sudah kasi kita; ttapi roh kuasa dan kaseh dan mnahan diri. |
1:8 | Sbab itu jangan malu bersaksi deri-hal Tuhan kita, dan jangan malu deri-hal sahya ini yang kna pasong kerna dia: ttapi biar-lah angkau sama-sama mnanggong susah kerna injil turut kuasa Allah; |
1:9 | yang slamatkan dan panggil kita dngan panggilan yang kudus, bukan-nya s-kdar kita punya perbuatan, ttapi s-kdar dia sndiri punya maksud dan anugrah, yang sudah di-brikan k-pada kita dalam Isa Almaseh dhulu deri-pada jman yang asal, |
1:10 | ttapi skarang sudah di-nyatakan oleh kdatangan Juru-slamat kita Isa Almaseh, yang sudah sudahkan kmatian, dan trangkan hidop dan hal yang ta'boleh binasa oleh injil, |
1:11 | dan kerna injil itu sahya sudah di-tntukan jadi satu pngajar dan rasul dan guru. |
1:12 | Dan kerna injil juga sahya kna rasa ini smoa: ttapi t'ada juga sahya malu; kerna sahya tahu sama siapa sahya sudah perchaya, dan sahya rasa dngan tntu yang itu perkara yang sahya sudah srahkan k-pada dia dia ada kuasa jagakan sampai hari itu. |
1:13 | Tuladan smoa perkata'an yang baik yang angkau sudah dngar deri sahya, pegang-lah dngan perchaya dan kaseh yang dalam Isa Almaseh. |
1:14 | Itu perkara yang baik yang sudah di-srahkan k-pada angkau, jagakan-lah oleh Roh Alkudus yang tinggal di dalam kita. |
1:15 | Ini perkara angkau tahu, ia'itu yang smoa orang di Asiah sudah undur deri-pada sahya; antara-nya Fugilus dan Hermogines. |
1:16 | Biar-lah Tuhan bri ksian-nya k-pada isi-rumah Onesiforus; kerna sudah banyak kali dia sgarkan sahya, dan t'ada malu sahya punya rantai; |
1:17 | ttapi bila dia ada di Rom, dia chari sama sahya dngan rajin sampai dapat |
1:18 | (biar-lah Tuhan kasi dia trima ksian deri-pada Tuhan dalam itu hari); dan dalam brapa perkara dia sudah layankan sahya di Ifisus, angkau pun tahu baik-baik. |