| 3:1 | Ttapi baik angkau tahu ini perkara, ia'itu pada jman yang kmdian skali nanti datang waktu yang susah. |
| 3:2 | Kerna orang nanti kaseh sama diri-nya, dan chinta wang, bsarkan diri, mnjadi sombong, umpat orang, derhaka sama mak-bapa, kurang trima-kaseh, ta'suchi, |
| 3:3 | t'ada taroh kaseh, t'ada mau berdamai, busokkan nama orang, t'ada mnahan diri, garang, t'ada suka apa yang baik, |
| 3:4 | pmbelot, kpala kras, sombong, suka lazat lbeh deri suka Allah: |
| 3:5 | yang pegang rupa kbaktian, ttapi kuasa kbaktian itu dia-orang sudah tolakkan: palingkan diri angkau deri ini smoa. |
| 3:6 | Kerna ini macham-lah punya orang yang masokkan diri-nya dngan smbunyi dalam orang punya rumah, dan tangkap prempuan-prempuan bodoh yang tertimbon dngan dosa-nya, dan yang kna ssat oleh jnis-jnis punya k'inginan, |
| 3:7 | slalu dia-orang ada blajar, ttapi ta'pernah dapat tahu kbtulan itu. |
| 3:8 | S-bagimana Yannis dan Yambris sudah tahankan Musa, bgini juga ini orang smoa tahankan kbtulan itu; ia'itu orang yang rosak akal, dan yang sudah kna buang fasal iman. |
| 3:9 | Ttapi dia-orang t'ada nanti maju lagi; kerna dia-orang punya kbodohan nanti jadi nyata sama smoa orang, sperti itu dua orang punya kbodohan sudah jadi. |
| 3:10 | Ttapi angkau ini sudah ikut sahya punya pngajaran, klakuan, maksud, perchaya, panjang hati, kaseh, sabar, |
| 3:11 | aniaya dan ksusahan smoa, yang sudah jadi sama sahya di Antakiah, di Ikonium, dan di Lustra; dan brapa aniaya sahya kna tahan; ttapi Tuhan sudah lpaskan sahya kluar deri itu smoa. |
| 3:12 | Dan sgala orang yang mau bawa diri dalam Isa Almaseh dngan kbaktian nanti kna aniaya. |
| 3:13 | Ttapi orang-orang yang jahat dan yang mnipu nanti bertambah-tambah jahat-nya, dia ssatkan orang, dan sndiri kna ssat. |
| 3:14 | Ttapi angkau ini tinggal-lah ttap dalam perkara-perkara yang angkau sudah blajar dan yang tntu dalam angkau punya hati, sbab angkau tahu deri-pada siapa angkau sudah blajar itu; |
| 3:15 | dan lagi deri kchil angkau sudah tahu kitab yang kudus, yang ada kuasa kasi angkau bijaksana yang datangkan slamat oleh perchaya yang dalam Isa Almaseh. |
| 3:16 | S-gnap kitab yang di-ilhamkan oleh Allah ada berguna kerna plajaran, dan tguran, dan btulkan klakuan, dan kerna pngajaran dalam kbnaran: |
| 3:17 | spaya Allah punya orang boleh jadi lngkap, chukop lngkap kerna smoa pkerja'an yang baik. |
2 Timotius 3 - Alkitab Melayu Baba
