| 6:1 | S-brapa orang yang mnjadi hamba di bawah kok itu, biar-lah dia-orang bilangkan tuan-nya layak trima s-gnap hormat, spaya jangan nama Allah dan pngajaran itu kna umpat. |
| 6:2 | Dan orang yang ada tuan-tuan yang perchaya, jangan dia-orang tngok ta'mata, sbab dia-orang mnjadi sudara-sudara; ttapi biar-lah dia-orang buat kerja hamba lbeh lagi, sbab dia-orang yang dapat untong-nya itu ada orang yang perchaya dan kkaseh. Ini smoa ajar-lah dan nasihatkan. |
| 6:3 | Jikalau barang-siapa ajar satu pngajaran yang lain, dan t'ada s-tuju sama perkata'an yang baik, ia'itu perkata'an Tuhan kita Isa Almaseh, dan sama pngajaran yang ikut kbaktian; |
| 6:4 | dia itu sombong, dngan ta'tahu satu pun, ttapi dia gila deri-hal perbantahan dan pertngkaran yang datangkan dngki, perklahian, umpat, sangka-sangka yang jahat, |
| 6:5 | perslisehan orang-orang yang ingatan rosak dan yang sudah hilang kbtulan, sbab dia sangka kbaktian itu satu jalan chari untong. |
| 6:6 | Ttapi kbaktian sama-sama puas-hati ia'itu untong bsar: |
| 6:7 | kerna satu pun kita t'ada bawa masok ini dunia, sdang satu pun kita ta'boleh bawa kluar; |
| 6:8 | ttapi sdang ada makanan dan pakaian, puas-lah hati kita sama ini smoa. |
| 6:9 | Ttapi orang yang mau jadi kaya jatoh dalam pnchoba'an dan jrat dan banyak-banyak k'inginan yang bodoh dan yang bawa chlaka, dan ini smoa tngglamkan orang dalam krosakan dan kbinasa'an. |
| 6:10 | Kerna chinta sama wang jadi satu akar yang kluarkan macham-macham jahat: dan ada orang yang chapai sama ini sudah ssat deri iman itu, dan sudah tikamkan diri-nya dngan banyak susah hati. |
| 6:11 | Ttapi angkau ini, hei Allah punya orang, lari-lah deri ini smoa; dan tuntut-lah kbnaran, kbaktian, perchaya, kaseh, sabar, dan hati yang lmah-lmbot. |
| 6:12 | Lawan-lah dalam iman punya lawanan yang baik, pegang-lah hidop yang kkal, yang kerna-nya angkau sudah di-panggil, dan sudah mngaku satu pngakuan yang baik di dpan banyak saksi-saksi. |
| 6:13 | Sahya psan angkau di dpan Allah yang hidopkan sgala perkara, dan dpan Isa Almaseh yang sudah saksikan satu pngakuan yang baik di dpan Pontius Pilatus; |
| 6:14 | pliharakan-lah hukum itu, dngan t'ada chachat dan t'ada chla, sampaikan Tuhan kita Isa Almaseh ternampak: |
| 6:15 | dan itu dia nanti nyatakan pada waktu-nya, ia'itu Kkuasa'an yang terpuji dan yang satu saja, Raja atas sgala raja, dan Tuan atas sgala tuan; |
| 6:16 | dia saja yang ada hal ta'boleh mati, dan yang tinggal dalam trang yang orang ta'boleh rapat; yang satu orang pun blum tengok, dan yang satu orang pun ta'boleh tengok; dan k-pada dia jadi-lah hormat dan kuasa yang kkal. Amin. |
| 6:17 | Orang-orang yang kaya dalam jman skarang, psan-lah sama dia jangan dia jadi tinggi-hati, dan jangan harap kkaya'an punya ta'tntu, ttapi harap sama Allah, yang kasi kita smoa perkara dngan kaya-nya spaya bawa ksuka'an; |
| 6:18 | psan dia-orang buat baik, dan jadi kaya dalam perbuatan yang baik, suka kasi, dan mau bhagi-bhagikan; |
| 6:19 | dan simpan kerna diri-nya satu alasan yang baik sampai tempo yang mndatang, spaya dia boleh pegang sama hidop yang btul hidop, |
| 6:20 | Hei Timotius, jagakan perkara yang sudah di-srahkan k-pada angkau, dan paling deri orang ssat punya perchakapan sia-sia, dan perbantahan pngtahuan, yang sudah salah orang sbot pngtahuan; |
| 6:21 | dan ada orang sudah mngaku itu pngtahuan, dan sudah ssat fasal iman itu. Biar-lah anugrah Allah sama-sama kamu smoa. |
1 Timotius 6 - Alkitab Melayu Baba
