3:1 | Ini perkata'an kperchaya'an, ia'itu, jikalau satu orang mau jadi bishop, baik juga punya kerja yang dia mau itu. |
3:2 | Sbab itu satu bishop patut t'ada berchla, dia punya bini satu saja, fikiran ttap, mnahankan diri, ikut aturan, suka sambot orang, tahu mngajar orang; |
3:3 | bukan orang yang gadoh-gadoh, atau berklahi; ttapi manis, dan t'ada suka berbantah-bantah, dan bukan orang yang chinta wang; |
3:4 | orang yang prentahkan baik-baik dia sndiri punya rumah-tangga, dan anak-buah-nya tundok sama dia dngan chukop snonoh; |
3:5 | (ttapi jikalau satu orang t'ada tahu prentahkan dia sndiri punya rumah-tangga, apa macham dia boleh jagakan eklisia Allah pula?) |
3:6 | jangan satu orang bharu masok, spaya jangan dia hilang akal sbab chongkak, dan masok hukuman iblis. |
3:7 | Lagi pun dia msti ada nama yang baik di antara orang luar pun; spaya jangan dia kna chla orang, dan masok prangkap iblis. |
3:8 | Bgitu juga patut diakon pun mnjadi snonoh, jangan lidah berchabang, bukan orang yang minum banyak ayer-anggor, bukan orang yang chari untong jahat; |
3:9 | yang pegang iman itu punya ruhsia dngan angan-angan hati yang suchi. |
3:10 | Biar ini orang smoa di-choba dhulu: kmdian kalau t'ada berchla, biar dia-orang buat diakon punya kerja. |
3:11 | Bgitu juga patut prempuan-prempuan pun mnjadi snonoh, bukan orang yang mngumpat, ttapi orang yang mnahan diri, dan yang kperchaya'an dalam smoa perkara. |
3:12 | Biar smoa diakon jadi orang yang ada satu bini saja, dan prentahkan baik-baik anak-anak-nya dan rumah-tangga-nya sndiri. |
3:13 | Kerna orang yang sudah buat kerja diakon baik-baik, dapat kerna diri-nya satu pangkat yang baik, dan jadi banyak brani dalam iman yang dalam Isa Almaseh. |
3:14 | Ini smoa sahya tulis k-pada angkau, sunggoh pun sahya harap mau datang k-pada angkau dngan sgra; |
3:15 | ttapi kalau sahya ada lambat, spaya angkau boleh tahu bagimana orang patut bawa diri-nya dalam rumah Allah, ia'itu eklisia Allah yang hidop, yang mnjadi tiang dan alas kbtulan itu. |
3:16 | Orang mngaku juga yang bsar-lah kbaktian punya ruhsia; dia yang sudah di-nyatakan dalam badan manusia, di-bnarkan dalam roh, ternampak k-pada mla'ikat-mla'ikat, di-khabarkan antara smoa bangsa, di-perchaya dalam dunia, di-bawa naik dalam kmulia'an. |