2:1 | Fasal kdatangan Tuhan kita Isa Almaseh, dan fasal kita berhimpon k-pada dia, kita minta sama kamu, hei sudara-sudara; |
2:2 | spaya jangan hati kamu lkas di-grakkan atau di-kjut-kan, 'ntah oleh roh, atau oleh perkata'an, atau oleh surat, spertikan datang deri-pada kita, ia'itu spertikan hari Tuhan itu skarang ada; |
2:3 | jangan satu orang pun tipu sama kamu dngan apa jalan pun; kerna t'ada nanti datang kalau blum datang itu tempo bila orang jadi murtad, dan terkluar pula itu orang-dosa, ia'itu anak kbinasa'an, |
2:4 | yang mlawan dan tinggikan diri-nya atas smoa yang di-sbot Allah atau yang di-smbah, sampai dia dudok di ka'abah Allah, serta tunjokkan diri-nya yang dia-lah Allah. |
2:5 | T'ada-kah kamu ingat yang waktu sahya ada sama-sama kamu lagi, sahya sudah bilang kamu ini smoa? |
2:6 | Dan skarang kamu tahu apa-kah yang ada tahankan spaya dia di-nyatakan dalam ktika-nya sndiri. |
2:7 | Kerna ruhsia derhaka itu memang ada bkerja; chuma ada dia yang tahankan skarang, sampai dia di-tpikan. |
2:8 | Bharu-lah yang derhaka itu nanti di-nyatakan; yang Tuhan Isa nanti bunoh dngan mulut-nya punya nafas, dan nanti habiskan dngan chahya kdatangan-nya: |
2:9 | ia'itu dia yang kdatangan-nya ada sperti pkerja'an Setan dngan sgala kuasa dan tanda-tanda dan perkara hairan yang bohong, |
2:10 | dan dngan sgala tipu-daya kjahatan kerna orang-orang yang ada binasa: sbab kaseh sama kbtulan itu dia-orang t'ada trima, spaya dapat slamat. |
2:11 | Dan deri sbab ini, Allah hantarkan atas dia-orang satu kuasa yang ssatkan, spaya dia-orang boleh perchaya apa yang bohong: |
2:12 | spaya sklian-nya yang t'ada perchaya kbtulan itu, ttapi suka kjahatan, boleh di-hukumkan. |
2:13 | Ttapi kita ini patut-lah slalu mnguchap shukor k-pada Allah deri-hal kamu, hei sudara-sudara yang Tuhan kasehkan, deri sbab Allah sudah pileh kamu deri mula-mula spaya dapat slamat dalam hal kamu di-kuduskan oleh Roh, dan dalam hal kamu perchaya kbtulan itu: |
2:14 | dan sbab ini-lah dia sudah panggil kamu oleh injil yang kita ajarkan, spaya boleh dapat kmulia'an Tuhan kita Isa Almaseh. |
2:15 | Sbab itu, hei sudara-sudara, biar-lah kamu berdiri ttap, dan pegang smoa pngajaran yang sudah di-ajarkan k-pada kamu, baik dngan perkata'an, baik dngan surat kita. |
2:16 | Biar-lah Tuhan kita Isa Almaseh sndiri, dan Bapa kita Allah yang sudah kaseh sama kita, dan kasi kita pnghiburan yang kkal dan harap yang baik oleh anugrah-nya, |
2:17 | hiburkan kamu punya hati, dan tgohkan dalam tiap-tiap pkerja'an dan perkata'an yang baik. |