4:1 | Sbab itu pnghabisan skali, hei sudara-sudara, kita minta dan nasihatkan kamu dalam Tuhan Isa, ia'itu sperti kamu sudah trima plajaran deri-pada kita bagimana kamu patut bawa diri kamu dan sukakan Allah, dan sperti ada juga kamu bawa kamu punya diri bgini, biar-lah kamu makin tambah-tambah. |
4:2 | Kerna kamu pun tahu apa perkara kita sudah psan sama kamu oleh Tuhan Isa. |
4:3 | Kerna ini-lah kahandak Allah, ia'itu kamu punya kkudusan, yang kamu jauhkan diri kamu deri persundalan; |
4:4 | yang masing-masing kamu tahu dapat bini-nya sndiri dalam hal yang kudus dan mulia, |
4:5 | bukan-nya dalam k'inginan hawa-nafsu, sperti orang bangsa-asing yang ta'knal sama Allah; |
4:6 | dan jangan satu orang pun tipu atau buat chlaka sama sudara-nya dalam itu hal: sbab Tuhan-lah yang balaskan dalam smoa itu perkara, sperti kita sudah bilang sama kamu lbeh dhulu, dan sperti kita sudah bersaksi. |
4:7 | Sbab Allah sudah panggil sama kita bukan-nya kerna kotoran, ttapi dalam kkudusan. |
4:8 | Sbab itu, orang yang tolakkan, bukan-nya manusia dia tolakkan, ttapi Allah yang mmbri Roh Alkudus-nya k-pada kamu. |
4:9 | Ttapi deri-hal kaseh k-pada sudara-sudara, ta'usah orang tulis k-pada kamu: kerna kamu sndiri sudah blajar deri-pada Allah spaya kaseh satu sama lain; |
4:10 | kerna kamu ada juga buat bgini k-pada smoa sudara yang di sluroh tanah Makadoniah. Ttapi kita nasihatkan kamu, hei sudara-sudara, biar-lah kamu punya kaseh makin bertambah-tambah; |
4:11 | dan biar-lah kamu ingin mnjadi diam-diam, dan buat kamu sndiri punya perkara, dan bkerja dngan kamu punya tangan, sperti kita sudah psan sama kamu; |
4:12 | spaya kamu boleh bawa diri dngan snonoh k-pada orang luar, dan spaya jangan satu pun terkurang sama kamu. |
4:13 | Ttapi kita mau kasi kamu tahu, hei sudara-sudara, deri-hal orang-orang yang tidor; spaya jangan kamu susah-hati, sperti orang-orang lain yang t'ada taroh harap. |
4:14 | Kerna kalau kita perchaya yang Isa sudah mati dan sudah berbangkit, bgitu juga orang-orang yang tidor dalam Isa nanti di-bawa sama-sama dia oleh Allah. |
4:15 | Kerna ini-lah kita kata sama kamu dngan perkata'an Tuhan, ia'itu kita ini yang ada hidop, yang tertinggal sampai kdatangan Tuhan, t'ada skali-kali nanti pergi lbeh dhulu deri-pada orang-orang yang tidor. |
4:16 | Kerna Tuhan sndiri nanti turun deri shorga, dngan satu sorak, dngan suara kpala mla'ikat, dan dngan Allah punya bunyi trompet: dan orang-orang yang sudah mati dalam Almaseh nanti bangkit dhulu: |
4:17 | kmdian kita ini yang lagi hidop, yang ada tertinggal, nanti kna rbot sama-sama dia-orang di dalam awan-awan, mau berjumpa Tuhan di udara: dan bgini-lah kita slalu nanti ada sama-sama Tuhan. |
4:18 | Sbab itu hiburkan-lah satu sama lain dngan ini perkata'an smoa. |