3:1 | Sbab itu, bila kita sudah ta'boleh tahan lagi, kita sudah suka-hati kna tinggal s'orang-s'orang di Atin; |
3:2 | dan sudah hantarkan Timotius, ia'itu sudara kita dan playan Allah dalam pkerja'an injil Almaseh, spaya dia boleh ttapkan kamu dan hiburkan kamu deri-hal kamu punya perchaya; |
3:3 | spaya jangan satu orang pun di-grakkan oleh ini ksusahan smoa: kerna kamu sndiri tahu yang kerna ini-lah kita sudah di-tntukan. |
3:4 | Kerna waktu kita lagi ada sama-sama kamu, kita sudah bilang kamu lbeh dhulu yang kita msti kna ksusahan; sperti sudah jadi, dan kamu pun tahu. |
3:5 | Sbab itu, bila sahya sudah ta'boleh tahan lagi, sahya sudah hantarkan orang pergi spaya dapat tahu fasal kamu punya perchaya, sbab takot kamu sudah kna choba oleh si-pnchoba itu, dan kita punya pnat mnjadi perchuma saja. |
3:6 | Ttapi skarang Timotius bharu datang deri kamu k-pada kita, dan bawa khabar yang baik deri-hal kamu punya perchaya dan kaseh, dan deri-hal kamu ada slalu ingat sama kita dngan baik, dan rindu mau tengok kita, sperti kita pun mau tengok kamu; |
3:7 | itu sbab-lah, hei sudara-sudara, dalam smoa kita punya chlaka dan ksusahan kita punya hati ada hibur deri-hal kamu, deri sbab kamu punya perchaya: |
3:8 | kerna skarang kita hidop, kalau kamu ttap dalam Tuhan. |
3:9 | Kerna apa macham-kah punya shukor kita boleh balaskan k-pada Allah deri-hal kamu ini, kerna smoa ksuka'an yang kita ada dpan Tuhan kita deri kamu punya sbab? |
3:10 | siang-malam sangat-sangat kita minta do'a mau tengok kamu punya muka, dan mau chukopkan sgala kkurangan dalam kamu punya perchaya. |
3:11 | Biar-lah Allah sndiri, ia'itu Bapa kita, dan Tuhan kita Isa pun, btulkan kita punya jalan sampai k-pada kamu: |
3:12 | dan biar-lah Tuhan kasi kamu pula bertambah-tambah dan mlempah dalam kaseh satu sama lain, dan sama sklian orang, sperti kita pun sama kamu; |
3:13 | spaya dia boleh ttapkan kamu punya hati dngan t'ada bersalah dalam hal kkudusan di dpan Allah, ia'itu Bapa kita, waktu kdatangan Tuhan kita Isa sama-sama smoa dia punya orang-kudus. |