3:1 | Hei sudara-sudara, sahya ini ta'boleh berchakap sama kamu sperti sama orang yang rohani, ttapi sperti sama orang yang dalam tabi'at dunia, ia'itu sperti anak-anak kchil dalam Almaseh. |
3:2 | Sahya sudah kasi kamu minum susu, bukan-nya daging; kerna itu ktika kamu blum boleh tahan, dan sampai skarang pun blum juga kamu boleh; |
3:3 | kerna kamu ini ada dalam tabi'at dunia lagi: kerna sdang ada dngki dan pertngkaran di antara kamu smoa, bukan-kah kamu dalam tabi'at dunia, dan bawa diri sperti orang dunia? |
3:4 | Kerna bila ada orang kata, "Sahya ini Paulus punya," dan ada lain orang kata, "Sahya ini Apollos punya," bukan-kah kamu orang dunia juga? |
3:5 | Ttapi apa-kah Apollos itu? dan apa-kah Paulus itu? Chuma orang playan yang oleh-nya kamu sudah perchaya; dan masing-masing sperti Tuhan sudah kasi sama dia. |
3:6 | Sahya ini sudah tanam, dan Apollos sudah siram, ttapi Allah juga yang sudah kasi bertumboh. |
3:7 | Jadi itu, baik orang yang tanam, baik orang yang siram, satu pun tidak, chuma Allah juga yang kasi bertumboh. |
3:8 | Orang yang tanam dan orang yang siram, dua-dua satu juga: ttapi masing-masing nanti trima dia sndiri punya upah, s-kdar kpnatan-nya sndiri. |
3:9 | Kerna kita ini Allah punya kawan dalam pkerja'an: kamu pula jadi Allah punya ladang, Allah punya bangunan. |
3:10 | S-kdar anugrah Allah yang sudah di-bri k-pada sahya, dan sperti kpala-tukang yang bijaksana, sahya sudah ltakkan alasan; dan lain orang naikkan rumah di atas-nya. Ttapi biar-lah tiap-tiap orang jaga baik-baik apa macham dia naikkan rumah di atas-nya. |
3:11 | Kerna satu orang pun ta'boleh ltakkan alasan lain deri-pada itu satu yang ada sdia terltak, ia'itu Isa Almaseh. |
3:12 | Ttapi jikalau di atas itu alasan ada orang naikkan rumah deri-pada mas, perak, batu yang indah-indah, kayu, rumput-kring, batang padi; |
3:13 | tiap-tiap orang punya pkerja'an nanti jadi nyata: kerna itu hari nanti trangkan, kerna itu hari nanti di-nyatakan dngan api; dan itu api-lah nanti ujikan apa macham-kah masing-masing punya pkerja'an. |
3:14 | Jikalau pkerja'an barang-siapa yang bangunkan di atas-nya jadi ttap, itu orang nanti trima upah. |
3:15 | Jikalau barang-siapa punya pkerja'an hangus, rugi-lah dia itu: ttapi dia sndiri nanti slamat; ttapi dalam pada itu sperti dia kna api. |
3:16 | T'ada-kah kamu tahu yang kamu smoa Allah punya ka'abah, dan Roh Allah ada tinggal di dalam kamu? |
3:17 | Jikalau barang-siapa binasakan ka'abah Allah, dia-lah yang Allah nanti binasakan: kerna ka'abah Allah itu kudus, dan itu-lah kamu smoa. |
3:18 | Jangan-lah satu orang pun tipukan diri-nya sndiri. Jikalau barang-siapa di antara kamu fikir yang dia bijaksana di dalam ini jman, baik dia jadi bodoh, spaya dia boleh mnjadi bijaksana. |
3:19 | Kerna ini dunia punya bijaksana jadi kbodohan dpan Allah. Kerna ada tersurat, "Dia yang tangkap orang bijaksana dalam dia-orang punya cherdek:" |
3:20 | dan lagi, "Tuhan tahu orang bijaksana punya bichara, yang ia'itu sia-sia." |
3:21 | Sbab itu jangan-lah satu orang pun mgahkan diri-nya dalam hal manusia. Kerna smoa perkara kamu-lah punya; |
3:22 | baik Paulus, baik Apollos, baik Kifas, baik dunia, baik kahidopan, baik kmatian, baik perkara yang skarang ada, baik perkara yang nanti datang: smoa-nya kamu punya; |
3:23 | dan kamu ini Almaseh punya; dan Almaseh pula Allah punya. |