5:1 | Jadi bila orang-banyak ada impitkan dia, dan dngar perkata'an Allah, dia ada berdiri di tpi tasek Gnesarat; |
5:2 | dan dia tengok dua prahu ada di tpi tasek: ttapi orang tangkap ikan sudah kluar deri-pada-nya, dan ada chuchi dia-orang punya pukat. |
5:3 | Dan Isa naik satu prahu, ia'itu prahu Simon, dan minta dia tolak sikit k-laut. Habis, dia dudok mngajar itu orang-banyak deri dalam itu prahu. |
5:4 | Kmdian bila dia sudah habis berchakap, dia kata sama Simon, "Tolak-lah k-pada tmpat yang dalam, dan turunkan kamu punya pukat spaya tangkap ikan." |
5:5 | Simon jawab kata, "Tuhan, s-panjang malam kita sudah kerja, dan t'ada dapat satu apa pun, ttapi sbab tuan kata, sahya nanti turunkan pukat." |
5:6 | Dan habis buat ini, dia-orang tangkap ikan terlalu-lah banyak, sampai pukat-nya mau koyak; |
5:7 | dan dia-orang lambai tangan sama kawan-kawan-nya yang dalam lain prahu, spaya dia-orang boleh datang tolong. Itu orang datang dan pnohkan dua-dua prahu, sampaikan hampir tngglam. |
5:8 | Ttapi bila Simon Petrus tengok ini, dia jatoh di lutut Isa, dan kata, "Ya Tuhan, undor-lah deri-pada sahya; kerna sahya ini orang berdosa." |
5:9 | Kerna dia hairan, dan sgala orang yang ada sama-sama dia pun, deri sbab sudah tangkap bgitu banyak punya ikan; |
5:10 | dan bgitu juga Yakob sama Yahya, anak Zabdi, yang kongsi sama Simon. Ttapi Isa kata sama Simon. "Jangan-lah takot; mula'i deri-pada ini waktu angkau nanti tangkap orang pula." |
5:11 | Bila dia-orang sudah bawa prahu itu di darat, dia-orang tinggalkan smoa dan ikut Isa. |
5:12 | Dan sudah jadi, ktika dia ada dalam satu negri, ada satu orang yang satu badan-nya tai-ko: bila ini orang tengok sama Isa, dia jatoh tertiarap minta sama dia, dan kata, "Ya Tuhan, kalau Tuhan mau, boleh juga Tuhan kasi sahya berseh." |
5:13 | Isa hulorkan tangan jamah sama dia, dan kata, "Sahya mau; jadi-lah angkau berseh." Dan itu juga itu orang punya tai-ko sudah habis hilang. |
5:14 | Dan Isa psan dia jangan kata sama satu orang pun: "ttapi pergi-lah tunjokkan angkau punya diri k-pada imam, dan bawa persmbahan kerna angkau punya ksuchian, sperti Musa sudah suroh, spaya jadi satu ksaksian k-pada dia-orang." |
5:15 | Ttapi makin lbeh pchah khabar deri-hal dia: dan banyak skali orang datang mau dngar, dan mau minta smbohkan pnyakit-nya. |
5:16 | Ttapi Isa undor di tmpat yang sunyi, dan minta do'a. |
5:17 | Dan ada satu hari Isa mngajar orang, dan ada orang Farisi sama orang yang mngajar taurit dudok di situ, yang sudah datang deri sgala kampong Galil dan Yahudiah, dan deri Yerusalim pun; dan kuasa Tuhan ada sama dia spaya smbohkan orang. |
5:18 | Ada orang bawa satu orang yang sakit tepok, terbaring di atas tmpat-tidor: dan dia-orang chari jalan mau bawa dia masok, dan mau ltakkan dia dpan Isa. |
5:19 | Dia-orang ta'boleh dapat jalan mau bawa dia masok sbab itu orang-banyak, jadi dia-orang naik atas itu rumah punya gnting-rata, dan hulorkan dia turun dngan tmpat-tidor-nya trus deri gnting di tngah-tngah dpan Isa. |
5:20 | Bila Isa tengok dia-orang punya perchaya, dia kata sama itu orang sakit, "Hei kawan, angkau punya dosa-dosa sudah di-ampunkan." |
5:21 | Dan itu orang pnulis sama orang Farisi mula'i berrondeng, dan kata, "Siapa ini orang yang chakap hujat? Siapa ada kuasa ampunkan dosa, chuma Allah saja." |
5:22 | Ttapi Isa tahu dia-orang punya rondengan, dan dia jawab kata sama dia-orang, "Apa itu yang kamu ada berrondeng dalam kamu punya hati? |
5:23 | Mana lbeh snang, kata, 'Angkau punya dosa sudah di-ampunkan;' atau kata, 'Bangun berjalan?' |
5:24 | Ttapi spaya kamu boleh tahu yang Anak-manusia ada kuasa di atas bumi ampunkan dosa (dia kata sama itu orang sakit tepok), sahya kata sama angkau, bangun, angkat angkau punya tmpat tidor, dan pulang, rumah." |
5:25 | Dan itu juga itu orang bangun di dpan dia-orang, dan angkat apa yang atas-nya dia baring, dan pergi rumah-nya sndiri, sambil muliakan Allah. |
5:26 | Dan smoa orang terchngang-chngang, dan muliakan Allah: dan dia-orang smoa pnoh dngan ktakotan, dan kata, "Ini hari kita sudah tengok perkara yang hairan." |
5:27 | Kmdian deri-pada ini smoa, Isa kluar, dan tengok satu orang yang pungut chukai, bernama Liwi, dudok di tmpat orang bayer chukai. Dan Isa kata sama dia, "Ikut-lah sama sahya." |
5:28 | Dan dia tinggalkan smoa, dan bangun ikut sama Isa. |
5:29 | Dan Liwi bikin satu perjamuan bsar kerna Isa dalam rumah-nya sndiri: dan ada banyak skali orang yang pungut chukai dan orang lain pun yang dudok makan sama-sama dia-orang. |
5:30 | Dan orang Farisi sama dia-orang punya orang pnulis bersungut sama murid-murid, dan kata, "Knapa kamu smoa makan minum sama orang yang pungut chukai dan orang-orang berdosa?" |
5:31 | Isa jawab kata sama dia-orang, "Doktor ada berguna bukan-nya sama orang yang sihat, ttapi sama orang yang sakit. |
5:32 | Sahya datang bukan-nya mau panggil orang-orang yang bnar, ttapi orang-orang berdosa, spaya dia-orang bertobat" |
5:33 | Dan dia-orang kata sama dia, "Yahya punya murid-murid krap kali puasa dan buat smbahyang; dan orang Farisi punya murid-murid pun bgitu; ttapi tuan punya ada makan minum." |
5:34 | Isa kata sama dia-orang, "Boleh-kah kamu suroh kmantin jantan punya sohbat-sohbat puasa waktu kmantin jantan ada sama-sama dia-orang? |
5:35 | Ttapi ada hari-nya nanti datang, bila kmantin jantan nanti kna ambil deri-pada dia-orang, itu ktika-lah dia-orang nanti puasa." |
5:36 | Dan lagi pun Isa katakan satu perumpama'an sama dia-orang, "T'ada orang koyakkan s-kping kain deri-pada pakaian yang bharu, dan tampalkan atas pakaian yang lama; kalau bgitu yang bharu punya kain pun nanti koyak, dan lagi pun tampalan kain yang bharu itu t'ada s-tuju dngan yang lama punya. |
5:37 | Dan t'ada orang taroh ayer-anggor yang bharu dalam botol-kulit yang lama; kerna kalau bgitu ayer-anggor yang bharu nanti rabekkan itu kulit, dan tumpah-lah itu ayer-anggor, dan kulit pun rosak-lah. |
5:38 | Ttapi ayer-anggor yang bharu patut di-taroh dalam kulit yang bharu. |
5:39 | Dan t'ada satu orang pun yang sudah minum yang lama punya yang sudah ingin yang bharu pula, kerna dia kata, 'Yang lama punya baik.'" |