| 20:1 | Dan ada satu hari, s-tngah dia ada mngajar orang bangsa itu di dalam ka'abah, dan ada khabarkan injil, kpala-kpala imam sama orang pnulis dngan orang tua-tua datang k-pada dia; |
| 20:2 | dan berchakap, dan kata sama dia, "Bilang sama kita: ini smoa angkau buat dngan apa kuasa? atau siapa-kah yang sudah kasi angkau ini kuasa?" |
| 20:3 | Dan Isa jawab kata sama dia-orang, "Sahya pun mau tanya sama kamu satu perkara; dan bilang sama sahya: |
| 20:4 | Yahya punya baptisan itu deri shorga-kah, atau deri-pada manusia?" |
| 20:5 | Dan dia-orang berrondeng satu sama lain, kata "Kalau kita bilang, 'Deri shorga'; dia nanti kata, 'Knapa-kah kamu t'ada perchaya sama dia? |
| 20:6 | Ttapi kalau dia bilang, 'Deri-pada manusia,' smoa orang bangsa ini nanti hntam batu sama kita, kerna dia-orang ttap perchaya yang Yahya itu satu nabi." |
| 20:7 | Jadi dia-orang jawab, yang dia-orang ta'tahu deri mana. |
| 20:8 | Dan Isa kata sama dia-orang, "Sahya pun t'ada kata sama kamu dngan apa kuasa sahya ada buat ini smoa." |
| 20:9 | Dan Isa mula'i katakan ini perumpama'an k-pada orang bangsa itu: "Ada satu orang sudah tanam satu kbun anggor, dan sewakan k-pada orang-ladang, kmdian dia pergi tinggal lama juga dalam lain negri. |
| 20:10 | Bila sampai musim-nya, dia hantarkan satu hamba k-pada itu orang-ladang, spaya dia-orang boleh kasi dia buah-buah kbun itu: ttapi itu orang-ladang pukol sama dia, dan kasi dia pergi dngan tangan kosong. |
| 20:11 | Dan dia hantarkan lagi satu hamba: dan dia pun dia-orang pukol, dan kasi malu, dan halau dia pergi dngan tangan kosong. |
| 20:12 | Dan dia hantarkan nombor tiga punya orang: dan dia pun dia-orang lukakan, dan tolak dia kluar. |
| 20:13 | Dan itu kbun punya tuan kata, 'Apa sahya mau buat? Sahya mau hantarkan anak sahya yang sahya kaseh: barangkali dia-orang nanti kasi hormat sama dia.' |
| 20:14 | Ttapi bila orang-ladang tengok itu anak, dia-orang berrondeng satu sama lain, dan kata, 'Dia ini-lah waris-nya: mari kita bunoh sama dia, spaya dia punya psaka boleh jadi kita punya.' |
| 20:15 | Jadi dia-orang tolak dia kluar kbun anggor, dan bunoh sama dia. Sbab itu, apa-kah tuan kbun itu nanti buat sama dia-orang? |
| 20:16 | Dia nanti datang binasakan ini orang-ladang smoa, dan nanti kasi itu kbun k-pada lain orang." Bila orang dngar, dia-orang kata, "Tuhan jauhkan-lah." |
| 20:17 | Ttapi Isa pandang sama dia-orang, dan kata, "Kalau bgitu, apa-kah ini yang ada tersurat: 'Batu yang sgala tukang sudah buangkan, Itu juga sudah di-jadikan kpala pnjuru'? |
| 20:18 | Tiap-tiap orang yang jatoh atas batu itu, dia nanti rmok; ttapi orang yang kna dia timpa, nanti habis hanchor." |
| 20:19 | Dan orang-orang pnulis sama kpala-kpala imam chari jalan mau tangkap sama dia itu jam juga; chuma dia-orang takotkan orang-banyak: kerna dia-orang sudah tahu yang dia sudah chakap ini perumpama'an atas dia-orang. |
| 20:20 | Dan dia-orang jaga sama dia, dan hantarkan brapa pngintai, yang pura-pura jadi orang bnar, mau tangkap dia punya chakap, spaya dia-orang boleh srahkan dia k-pada prentah dan kuasa gobernor. |
| 20:21 | Dan dia-orang tanya sama dia, dan kata, "Hei guru, kita tahu yang guru chakap dan mngajar orang dngan btul, dan t'ada tengok-tengok orang punya muka, ttapi ajarkan jalan Allah dngan bnar: |
| 20:22 | ada-kah halal kita bayer chukai k-pada Kaisar atau tidak?" |
| 20:23 | Ttapi dia tahu dia-orang punya cherdek, dan kata sama dia-orang. |
| 20:24 | "Tunjokkan sahya satu dinar. Siapa punya gambar dan chap ada sama dia?" Dia-orang kata, "Kaisar punya." |
| 20:25 | Dan Isa kata sama dia-orang. "Kalau bgitu, apa yang Kaisar punya, bayer-lah k-pada Kaisar; dan apa yang Allah punya, kasi-lah k-pada Allah." |
| 20:26 | Dan dia-orang ta'boleh tangkap itu perchakapan dpan orang bangsa itu: dan dia-orang hairan sama dia punya jawab, dan diam saja. |
| 20:27 | Dan ada orang Saduki datang sama dia, orang yang kata tidak ada kbangkitan; dan dia-orang tanya sama dia, |
| 20:28 | dan kata, "Guru, Musa ada tulis sama kita, yang jikalau satu orang punya sudara mati, dan ada bini, ttapi t'ada anak, adek-nya patut ambil bini-nya, dan dapat kturunan kerna sudara-nya. |
| 20:29 | Ada tujoh adek-beradek dlaki: yang sulong kahwin satu bini, dan dia mati dngan t'ada anak; |
| 20:30 | dan yang nombor dua, |
| 20:31 | sama nombor tiga pula ambil itu prempuan; dan bgitu juga smoa tujoh-tujoh t'ada tinggalkan anak bila dia-orang mati. |
| 20:32 | Kmdian skali itu prempuan pula mati. |
| 20:33 | Jadi, dalam itu kbangkitan, itu prempuan jadi mana satu punya bini, kerna tujoh-tujoh sudah kahwin sama dia?" |
| 20:34 | Dan Isa kata sama dia-orang, "Anak-anak jman ini kahwin dan di-kahwinkan: |
| 20:35 | ttapi orang yang di-bilangkan layak boleh sampai jman yang mndatang, dan kbangkitan deri antara orang mati, t'ada kahwin atau di-kahwinkan: |
| 20:36 | kerna dia-orang ta'boleh mati lagi: sbab dia-orang ada sama dngan mla'ikat-mla'ikat; dan dia-orang anak-anak Allah, sbab dia-orang anak-anak kbangkitan. |
| 20:37 | Ttapi yang orang mati nanti di-bangkitkan, Musa pun ada trangkan, dalam perkata'an deri-hal 'Pokok duri,' bila dia trick Tuhan, 'Allah Ibrahim, dan Allah Isahak, dan Allah Yakob.' |
| 20:38 | Dia bukan-nya orang mati punya Allah, ttapi orang yang hidop punya: kerna smoa orang hidop k-pada Allah." |
| 20:39 | Dan ada orang pnulis jawab, kata, "Guru sudah bilang btul." |
| 20:40 | Kerna dia-orang t'ada lagi brani tanya apa-apa sama dia. |
| 20:41 | Dan dia kata sama dia-orang, "Bagimana orang bilang yang Almaseh itu anak Da'ud? |
| 20:42 | Kerna Da'ud sndiri kata dalam kitab Mazmur, 'Tuhan sudah kata sama sahya punya Tuan, "Dudok-lah angkau di sblah kanan sahya |
| 20:43 | Sampai sahya taroh musoh-musoh-mu jadi alas kaki-mu."' |
| 20:44 | Jadi itu, Da'ud triak dia 'Tuan,' dan bagimana pula dia boleh jadi anak-nya?" |
| 20:45 | Sambil smoa orang bangsa itu dngar, Isa kata sama murid-murid-nya, |
| 20:46 | "Jaga kamu punya diri deri-pada orang pnulis, yang suka jalan-jalan dngan baju panjang-panjang, dan suka trima orang punya tabek di pasar, dan suka krusi yang mulia-mulia di rumah smbahyang, dan tmpat yang mulia-mulia dalam perjamuan; |
| 20:47 | yang habis makankan rumah-tangga prempuan bujang, dan bikin do'a panjang-panjang sbab pura-pura: ini smoa-lah yang nanti trima lbeh brat punya hukuman." |
Lukas 20 - Alkitab Melayu Baba
