10:1 | Kmdian deri pada ini smoa, Tuhan tntukan tujoh-puloh orang lain pula, dan suroh dia-orang pergi dua sama dua lbeh dhulu dia, k-pada tiap-tiap negri dan tmpat yang dia sndiri nanti pergi. |
10:2 | Dan Isa kata sama dia-orang, "Tuaian-nya btul banyak, ttapi orang yang mnuai chuma sikit saja: sbab itu minta-lah do'a sama itu tuaian punya tuan, spaya dia boleh suroh orang pergi mnuai di tmpat tuaian-nya. |
10:3 | Pergi-lah kamu: ingat, sahya hantarkan kamu sperti anak-kambing antara anjing-hutan. |
10:4 | Jangan bawa pundi-pundi, atau tmpat bkal, atau kasut: dan jangan kasi tabek sama satu orang pun di jalan. |
10:5 | Dan apa-apa rumah yang kamu masok, mula-mula kata, 'Sjahtra-lah ini rumah.' |
10:6 | Dan jikalau di situ ada satu anak sjahtra, kamu punya sjahtra nanti tinggal atas dia; ttapi jikalau tidak, nanti pulang balek sama kamu. |
10:7 | Dan dalam itu rumah juga tinggal, makan-minum apa-apa yang orang kasi: kerna orang yang kerja ada layak dapat upah-nya. Jangan pindah deri satu rumah pergi lain rumah. |
10:8 | Dan apa-apa negri yang kamu masok, dan orang sambot sama kamu, makan-lah apa-apa yang orang ltak dpan kamu: |
10:9 | dan smbohkan orang-orang yang sakit dalam itu negri, dan kata sama dia-orang, 'Kraja'an Allah sudah dkat kamu.' |
10:10 | Ttapi apa-apa negri yang kamu nanti masok, dan orang t'ada sambot sama kamu, pergi-lah kluar di jalan-jalan-nya, dan kata, |
10:11 | 'Kamu punya negri punya habok skali pun, yang ada terlngkat di kaki, kita sapukan sbab kamu: dalam pada itu biar-lah kamu tahu ini perkara, ia'itu yang kraja'an Allah sudah dkat.' |
10:12 | Ttapi sahya kata sama kamu, dalam itu hari tanah Sadom nanti kna lbeh ringan deri-pada itu negri. |
10:13 | Susah-lah angkau, hei Kurazin! susah-lah angkau, hei Bait-Saida! kerna jikalau dalam Tur dan Sidon sudah jadi m'ujizat sperti yang sudah jadi dalam kamu, lama-lah itu dua negri sudah pun bertobat, dudok dngan pakaian karong dan habu. |
10:14 | Dalam pada itu, tanah Tur dan Sidon nanti kna lbeh ringan dalam itu kiamat deri-pada kamu. |
10:15 | Dan angkau, hei Kafarnahum, angkau nanti di-tinggikan sampai k-langit-kah? angkau nanti di-turunkan sampai alam maut. |
10:16 | Orang yang dngar sama kamu, dia dngar sama sahya: dan orang yang tolakkan sama kamu, dia tolakkan sahya; dan orang yang tolakkan sahya, dia tolakkan sama dia yang sudah hantarkan sahya." |
10:17 | Dan itu tujoh-puloh orang pulang dngan ksuka'an, dan kata, "Ya Tuhan, sampaikan jin smoa pun turut prentah kita dalam nama Tuhan." |
10:18 | Dan Isa kata sama dia-orang, "Sahya sudah tengok Setan jatoh sperti kilat deri langit. |
10:19 | Ingat, sahya sudah kasi kamu kuasa pijak ular sama kala-jngking, dan kuasa atas sgala kkuatan musoh itu: dan skali-kali t'ada satu apa pun nanti kasi kamu chlaka. |
10:20 | Dalam pada itu, jangan bersuka-suka deri sbab jin smoa turut kamu punya prentah; ttapi bersuka-suka-lah deri sbab kamu punya nama ada tertulis dalam shorga." |
10:21 | Dan itu jam juga Isa bersuka-suka dalam Roh Alkudus, dan kata, "Ya Bapa, langit dan bumi punya Tuhan, sahya mnguchap shukor k-pada-mu sbab Bapa sudah smbunyikan ini smoa deri-pada orang yang bijaksana dan berakal, dan sudah nyatakan k-pada anak-anak kchil: ya, Bapa; kerna bgini-lah yang berknan k-pada-mu. |
10:22 | Smoa perkara Bapa sahya sudah srahkan k-pada sahya: dan t'ada satu orang pun tahu siapa-kah Anak itu, chuma Bapa saja; dan siapa-kah Bapa itu, chuma Anak saja, dan orang yang k-pada-nya Anak suka nyatakan." |
10:23 | Dan dia balek k-pada murid-murid, dan kata sama dia-orang sndiri saja, "Berkat-lah mata yang tengok perkara-perkara yang kamu tengok ini: |
10:24 | kerna sahya kata sama kamu, banyak juga nabi-nabi dan raja-raja yang mau nampak perkara yang kamu tengok, ttapi ta'nampak; dan mau dngar perkara yang kamu dngar, ttapi t'ada dngar." |
10:25 | Dan ada satu guru taurit berdiri mau choba sama Isa, dan kata, "Hei guru, apa-kah sahya msti buat spaya dapat hidop yang kkal jadi psaka?" |
10:26 | Dan Isa kata sama dia, "Apa ada tersurat dalam hukum-taurit? bagimana angkau bacha?" |
10:27 | Itu orang jawab kata, "Kaseh-lah Tuhan-mu Allah dngan s-bulat-bulat hati-mu, dan dngan s-gnap jiwa-mu, dan dngan s-kuat-kuat kuasa-mu, dan dngan sgala ingatan-mu; dan sama orang sblah-mnyblah sperti diri-mu sndiri." |
10:28 | Isa kata sama dia, "Angkau sudah jawab btul: buat-lah bgini, dan angkau boleh hidop." |
10:29 | Ttapi sbab dia mau bnarkan dia punya diri, dia tanya sama Isa, "Dan siapa-kah sahya punya orang-sblah?" |
10:30 | Isa kasi jawab, dan kata, "Ada satu orang berjalan turun deri Yerusalim pergi Yeriko; dan dia kna samon, dan itu pnyamon smoa psiangkan pakaian-nya, dan pukol sama dia, habis itu dia-orang pergi, tinggalkan dia sparoh mati. |
10:31 | Jadi ada satu imam pula jalan turun di situ: dan bila dia nampak itu orang, dia lalu sblah sana. |
10:32 | Dan bgitu juga ada satu orang Liwi, bila dia sampai di situ, dan sudah nampak, dia pun lalu sblah sana. |
10:33 | Ttapi ada satu orang Samariah berjalan, sampai dkat dia; dan bila dia nampak, hati-nya rasa ksian, |
10:34 | dan dia datang dkat dia, dan ikat luka-luka-nya, dan tuangkan minyak sama ayer-anggor; kmdian naikkan dia di atas binatang-nya sndiri, dan bawa dia pergi satu rumah-tumpang, dan jaga sama dia. |
10:35 | Dan besok dia kluarkan dua dinar kasi sama itu rumah-tumpang punya tuan, dan kata, 'Jagakan sama dia; dan apa-apa angkau blanja lbeh, bila sahya balek, sahya nanti bayer sama angkau.' |
10:36 | Dalam ini tiga, mana satu angkau fikir sudah jadi orang-sblah sama itu orang yang sudah kna samon?" |
10:37 | Itu guru taurit kata, "Itu orang yang unjok ksian sama dia-lah." Dan Isa kata, "Pergi-lah angkau pun buat bgitu juga." |
10:38 | Sambil dia-orang berjalan, Isa masok dalam satu kampong: dan ada satu prempuan bernama Marta sambot dia masok rumah-nya. |
10:39 | Ini prempuan ada satu adek prempuan bernama Mariam, yang dudok di kaki Isa dngar perkata'an-nya. |
10:40 | Ttapi Marta pula ada bersibok deri sbab banyak kerja; jadi dia datang kata sama Isa, "Ya Tuhan, t'ada-kah Tuhan pduli fasal sudara sahya sudah biarkan sahya kerja s'orang-s'orang? sbab itu, Tuhan suroh-lah dia tolong sama sahya." |
10:41 | Ttapi Tuhan jawab kata sama dia, "Hei Marta, Marta, angkau ada khuatir dan sibok deri-hal banyak perkara: |
10:42 | ttapi satu perkara saja yang berguna: kerna Mariam sudah pileh itu bhagian yang baik, yang t'ada nanti di-ambil deri-pada dia." |