3:1 | Dan lagi skali Isa masok dalam rumah-smbahyang; dan di situ ada satu orang yang mati sblah tangan-nya. |
3:2 | Dan dia-orang intai sama dia, kalau dia mau smbohkan itu orang waktu hari perhentian; spaya dia-orang boleh d'awa sama dia. |
3:3 | Dan Isa kata sama itu orang yang mati tangan, "Berdiri di tngah-tngah." |
3:4 | Dan dia kata sama sklian orang, "Mana yang halal waktu hari perhentian? buat baik, atau buat aniaya? slamatkan nyawa orang, atau bunohkan?" Ttapi dia-orang diam skali. |
3:5 | Dan bila Isa sudah tengok kliling sama dia-orang dngan marah, dan susah-hati kerna dia-orang punya kras-hati, dia kata sama dia itu, "Hulorkan angkau punya tangan." Itu orang hulorkan tangan-nya, dan tangan-nya jadi baik. |
3:6 | Orang Farisi kluar, dan itu juga pakat sama orang Herodis mlawan Isa, bagimana boleh binasakan dia. |
3:7 | Dan Isa dngan murid-murid-nya undor pergi tasek: dan banyak skali orang ikut sama dia deri Galil: dan deri tanah Yahudiah, |
3:8 | dan deri Yerusalim, dan deri Adum, dan deri sbrang Yordan, dan dkat Tur dan Sidon, banyak skali orang datang sama dia, sbab dia-orang sudah dngar brapa bsar dia punya perbuatan. |
3:9 | Dan Isa chakap sama murid-murid-nya; suroh dia-orang sdiakan satu prahu kchil mnantikan dia, sbab orang banyak itu, spaya jangan dia-orang krumunkan sama dia: |
3:10 | kerna dia sudah smbohkan banyak orang; sampaikan s-banyak orang yang ada pnyakit datang berimpit mau jamah dia. |
3:11 | Dan sgala jin yang najis pun, bila-bila dia-orang tengok Isa, dia-orang jatoh dpan dia, dan bertriak-triak, kata, "Angkau-lah Anak Allah." |
3:12 | Ttapi dia psan sama dia-orang baik-baik jangan mashhurkan dia. |
3:13 | Isa naik gunong, dan panggil barang-siapa yang dia suka: dan dia-orang datang sama dia. |
3:14 | Dan dia tntukan dua-blas orang, spaya boleh bersama-sama dia, dan saya dia boleh hantarkan dia-orang pergi mngajar, |
3:15 | dan dapat kuasa buangkan jin. |
3:16 | Dan Simon dia glarkan Petrus; |
3:17 | dan Yakob anak Zabdi, sama Yahya sudara Yakob; ini dua dia glarkan Buanargis, arti-nya anak-anak guntor: |
3:18 | dan Andrias sama Filipus, dan Bar-Tolmai, dan Matius, dan Tomas, dan Yakob anak Halfi, dan Tadius, dan Simon orang Kanani, |
3:19 | dan Yudas Iskariot, yang sudah srahkan Isa. Dan Isa masok satu rumah. |
3:20 | Dan lagi skali orang-banyak berhimpon, sampaikan dia-orang mau makan pun ta'boleh. |
3:21 | Jadi bila orang rumah-nya dngar ini, dia-orang kluar mau pegang sama dia: kerna dia-orang kata, "Dia sudah gila." |
3:22 | Dan orang-orang pnulis yang turun deri Yerusalim kata, "Dia ini ada Ba'al-zabul," dan lagi, "Dia buangkan jin dngan kuasa kpala jin." |
3:23 | Dan dia panggil sama dia-orang, dan kata sama dia-orang dngan perumpama'an, "Bagimana boleh Setan buangkan Setan? |
3:24 | Dan jikalau satu kraja'an berblah mlawan sndiri, itu kraja'an ta'boleh kkal. |
3:25 | Dan jikalau satu rumah-tangga berblah mlawan sndiri, itu rumah-tangga pun ta'boleh kkal. |
3:26 | Dan jikalau Setan sudah bangun mlawan sndiri, dan berblah, dia pun ta'boleh kkal, ttapi sudah-lah sampai ksudahan-nya. |
3:27 | Ttapi satu orang pun ta'boleh masok dalam rumah orang kuat dan rampas herta-nya, jikalau blum dia ikat itu orang kuat dhulu; bharu-lah dia boleh rampas itu rumah. |
3:28 | Dngan sunggoh sahya kata sama kamu, yang kerna anak-anak Adam sgala dosa-dosa-nya dan hujat-nya pun, s-brapa yang dia-orang sudah hujatkan, nanti di-ampunkan: |
3:29 | ttapi barang-siapa yang mnghujatkan Roh Alkudus, dia itu t'ada dapat ampunan s-lama-lama-nya, ttapi dia terkna dosa yang kkal:" |
3:30 | kerna dia-orang sudah kata, "Dia ini ada jin yang najis." |
3:31 | Dan mak-nya sama sudara-sudara-nya pula datang; dan berdiri di luar, dan suroh orang pergi panggil sama dia. |
3:32 | Dan ada orang-banyak dudok kliling dia, dan dia-orang kata sama dia, "Tengok, tuan punya mak dan sudara-sudara di luar ada chari sama tuan." |
3:33 | Dan dia jawab kata sama dia-orang, "Siapa-kah sahya punya mak, dan sahya punya sudara-sudara?" |
3:34 | Dan dia tengok kliling sama orang yang dudok kliling dia, dan kata, "Tengok, ini-tah mak sahya dan sudara-sudara sahya. |
3:35 | Kerna barang-siapa yang berbuat kahandak Allah, dia-lah sahya punya sudara jantan, dan sudara prempuan, dan sahya punya mak." |