11:1 | Dan bila dia-orang smoa sampai dkat Yerusalim, sampai di Bait-Fagi dan Bait-Ani, yang di Bukit Zaitun,Isa hantarkan dua murid-murid-nya, |
11:2 | dan kata sama dia-orang, "Pergi itu kampong yang tntang kamu, dan bila masok, itu juga kamu nanti jumpa satu anak kaldai terikat, yang orang blum pernah tunggang; bukakan sama dia, dan bawa sini. |
11:3 | Dan jikalau ada orang kata sama kamu, 'Knapa kamu buat ini?' kamu boleh kata, 'Tuhan mau pakai sama dia,' dan itu juga dia nanti hantarkan balek di sini." |
11:4 | Jadi dia-orang pergi-lah, dan jumpa satu anak kaldai terikat, dkat pintu di luar di jalan bsar; dan dia-orang bukakan dia. |
11:5 | Dan ada orang yang berdiri di situ kata sama itu dua murid, "Apa buat kamu bukakan itu anak kaldai?" |
11:6 | Dan dia-orang kata sama itu orang sama sperti Isa sudah psan: dan dia-orang kasi itu murid-murid pergi. |
11:7 | Kmdian dia-orang bawa itu anak kaldai sama Isa, dan champakkan dia-orang punya pakaian di atas itu binatang; dan Isa dudok di atas-nya. |
11:8 | Dan banyak orang bntangkan dia-orang punya pakaian di jalan; dan yang ada pula daun-daun yang dia-orang sudah kratkan deri-pada kbun. |
11:9 | Dan orang yang jalan dhulu dan yang ikut pun bersorak-sorak kata, "Hosanna; berkat-lah dia itu yang datang dngan nama Tuhan: |
11:10 | berkat-lah kraja'an yang mndatang, kraja'an nenek-moyang kita Da'ud: Hosanna dalam ktinggian." |
11:11 | Dan dia masok Yerusalim, sampai dalam ka'abah; dan bila dia sudah pandang kliling sama smoa perkara, sbab hari sudah lat, dia kluar pergi Bait-Ani sama-sama dua-blas murid-murid itu. |
11:12 | Dan besok-nya bila dia-orang sudah kluar deri Bait-Ani, Isa lapar. |
11:13 | Dia tengok deri jauh satu pokok ara yang ada daun-nya, dan dia pergi, spaya barangkali boleh dapat apa-apa-kah di atas-nya: dan bila dia sampai dkat, dia chuma dapat daun saja; kerna itu bukan musim buah ara. |
11:14 | Isa jawab kata sama itu pokok, "Deri-pada ini waktu jangan lagi orang makan buah deri angkau sampai s-lama-lama-nya." Ini chakap murid-murid-nya dngar. |
11:15 | Kmdian dia-orang datang di Yerusalim: dan Isa masok dalam ka'abah, dan mula'i halaukan smoa orang yang jual-bli dalam ka'abah itu, serta balekkan meja-meja orang yang mniaga tukar wang, dan krusi orang yang jual burong komba; |
11:16 | dan dia ta'mau kasi satu orang pun lalu ka'abah itu dngan bawa perkakas. |
11:17 | Dan Isa mngajar, kata sama dia-orang, "Bukan-kah ada tersurat, 'Rumah sahya orang nanti sbotkan rumah berdo'a kerna sgala bangsa'? ttapi kamu sudah buatkan dia satu goa pnyamon." |
11:18 | Kpala-kpala imam sama orang pnulis dngar, dan chari jalan bagimana mau binasakan dia: kerna dia-orang takot dia, sbab smoa orang-banyak terchngang-chngang sama dia punya ajaran. |
11:19 | Dan bila sudah ptang, Isa slalu kluar deri negri. |
11:20 | Dan bila dia-orang lalu di situ pagi-pagi, dia-orang tengok itu pokok ara sudah layu dngan akar-akar-nya skali. |
11:21 | Petrus teringat, dan kata sama Isa, "Rabbi, tengok ini pokok yang Tuhan sudah sumpahkan sudah pun layu." |
11:22 | Dan Isa jawab kata sama dia-orang, "Taroh perchaya sama Allah. |
11:23 | Dngan sunggoh sahya kata sama kamu, barang-siapa bilang sama ini gunong, 'Terangkat-lah angkau, dan terchampak-lah dalam lautan;' dngan t'ada bimbang dalam hati-nya, ttapi perchaya yang apa dia bilang tntu nanti jadi; itu orang nanti dapat. |
11:24 | Sbab itu sahya kata sama kamu, baik apa-apa perkara pun kamu berdo'a dan minta perchaya-lah yang kamu sudah trima, dan kamu nanti dapat. |
11:25 | Ttapi bila-bila kamu berdiri minta do'a, jikalau kamu ada kchil hati sama orang, ampunkan dia; spaya kamu punya Bapa pun yang di shorga boleh ampunkan kamu punya ksalahan pula." |
11:26 | [KOSONG] |
11:27 | Dan lagi skali dia-orang datang di Yerusalim: dan s-tngah Isa berjalan di dalam ka'abah, kpala-kpala imam sama orang pnulis dan ktua-ktua datang sama dia, |
11:28 | dan kata sama dia, "Dngan apa kuasa angkau ada buat ini smoa? atau siapa sudah kasi angkau kuasa buat bgini?" |
11:29 | Dan Isa kata sama dia-orang, "Sahya pun mau tanya kamu satu perkara, dan kamu boleh jawab sama sahya, kmdian sahya pun nanti kata sama kamu dngan apa kuasa sahya buat ini smoa. |
11:30 | Yahya punya baptisan, itu deri shorga-kah atau deri-pada manusia? baik kamu kasi jawab sama sahya." |
11:31 | Dan dia-orang berrondeng satu sama lain, kata, "Kalau kita bilang, 'Deri shorga', dia nanti kata, 'Kalau bgitu, knapa-kah kamu t'ada perchaya sama dia?' |
11:32 | Ttapi kalau kita bilang 'Deri-pada manusia' "-dia-orang pula takot orang bangsa itu, kerna smoa orang btul bilangkan Yahya satu nabi. |
11:33 | Jadi, dia-orang jawab dan kata sama Isa, "Kita ta'tahu." Dan Isa pula kata sama dia-orang, "Sahya pun t'ada kata sama kamu dngan apa kuasa sahya buat ini smoa." |